តោះ! និយាយគ្នាលេង

ពួកសិស្សស្ទាវជិះម៉ូតូដេញកាប់គ្នា ប៉ូលិសចាប់បានពីរនាក់

ហែន សុថារដ្ឋ — Tue, 29 Nov 2011 11:14:59 +0000

សិស្សសាលាស្ទាវៗពីរនាក់ ត្រូវបានប៉ូលិសខណ្ឌទួលគោកចាប់ឃាត់ខ្លួន ជាមួយ នឹង ដាវសាម៉ូរ៉ៃមួយដើម បន្ទាប់ពីពួកគេជិះម៉ូតូដេញកាប់សិស្សសាលាដូចគ្នា កាលពីវេលាម៉ោង៥និង៣០ នាទីល្ងាចថ្ងៃទី២៨ខែវិច្ឆិកា នៅក្បែរសាលាសន្ធរម៉ុក ក្នុងសង្កាត់ទឹកល្អក់ទី១ ខណ្ឌទួលគោក។

ពេលដេញកាប់គ្នានោះ ជនសង្ស័យបានជួបគ្រោះថ្នាក់ចរាចរណ៍ បុករថយន្ត កាមរីមួយគ្រឿង ដាច់កញ្ចក់ចំហៀងម្ខាង និងបុកកង់មួយគ្រឿងទៀតបណ្តាល ឱ្យស្ត្រីម្នាក់ដែល ជិះកង់ រងរបួស ផងដែរ។ ស្ត្រីនោះឈ្មោះប៉ាន ស្រីមុំ អាយុ៣៨ឆ្នាំ ស្នាក់នៅសង្កាត់បឹងសាឡាង ខណ្ឌទួលគោក។

ជនសង្ស័យមានឈ្មោះវ៉ា សុវិន អាយុ១៩ឆ្នាំ សិស្សវិទ្យា ល័យ ជា ស៊ីម សន្ធរម៉ុក និងឈ្មោះជា សូឌីណា អាយុ២១ឆ្នាំជានិស្សិតឆ្នាំ ទីមួយសាកលវិទ្យាល័យ បញ្ញាសាស្ត្រ។ ពួកគេមាន ទីលំនៅ សង្កាត់ទឹកថ្លា ខណ្ឌសែនសុខ។ចំណែកភាគីម្ខាង ទៀតបានគេច ខ្លួន ទៅបាត់មិនដឹងថា មានរងរបួស ឬយ៉ាងណានោះទេ។

ជនសង្ស័យដែលប្រដាប់ដោយដាវសាម៉ូរ៉ៃ ជិះម៉ូតូមួយគ្រឿង ម៉ាកហុង ដា សេ១២៥ឆ្នាំ២០០៩ ដេញកាប់យុវសិស្សពីរនាក់ ជិះម៉ូតូហុងដាអាយខុន ពីម្តុំសាលាសន្ធរម៉ុករហូតដល់ ក្បែរផ្សារសំណង់១២ក្នុងសង្កាត់ទឹកល្អក់ទី៣ហើយបានជួបគ្រោះថ្នាក់ចរាចរណ៍ក៏ត្រូវប៉ូលិសចាប់ បាន តែម្តង៕

វិស័យសំណង់កើនជាង៩៩ភាគរយក្នុងរយ:ពេល១០ខែឆ្នាំ២០១១

ហែន សុថារដ្ឋ — Tue, 29 Nov 2011 04:34:13 +0000

គម្រោងវិនិយោគលើវិស័យសំណង់មានចំនួន១៨៥០គម្រោង លើផ្ទៃក្រឡាសំណង់ជាង៣លានម៉ែត្រក្រឡា រយ:ពេល១០ខែឆ្នាំ២០១១នេះ ដែលមានទុនវិនិយោគប្រមាណជាង១១០៩លានដុល្លារអាមេរិក គឺមានការកើនឡើងជាង៩៩ភាគរយបើប្រៀបធៀបទៅនឹងរយ:ពេលដូចគ្នាក្នុងឆ្នាំ២០១០។ នេះបើតាមការបញ្ជាក់របស់នាយកដ្ឋានសំណង់នៃក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី២៨ ខែវិច្ឆិកា ឆ្នាំ២០១១នេះ។

ប្រធាននាយកដ្ឋានសំណង់នៃក្រសួងរៀបចំដែនដី នគរូបនីយកម្ម និងសំណង់បានបញ្ជាក់ថា រាល់សំណង់ទាំងនេះ ភាគច្រើនប្រើទុនវិនិយោគក្នុងស្រុកច្រើនជាង។ទើបតែចុងឆ្នាំ២០១១នេះ ទុនវិនិយោគក្រៅប្រទេស កំពុងតែហក់ឡើង។ ភាគច្រើននៃការដុះលូតលាស់នៃបណ្តាសំណង់ទាំងនេះ ជាប្រភេទសំណង់ឧស្សាហកម្មកាត់ដេរ សំណង់លំនៅដ្ឋាន ជាលក្ខណ:បូរី គឺកើនខ្លាំងជាងគេ។ រោងចក្រអគ្គិសនី អាគាររដ្ឋបាលសាធារណ: និងសំណង់ច្រកសេដ្ឋកិច្ចចេញ-ចូលតែមួយ។ល។

មន្ត្រីរូបនេះបានបញ្ជាក់ទៀតថា កាលពី១០ខែឆ្នាំ២០១០គម្រោងវិនិយោគមានចំនួន១៨៣៥គម្រោង ស្មើនឹងផ្ទៃក្រឡាសំណង់ជាង២លានម៉ែត្រក្រឡា និងទុនវិនិយោគប្រមាណជាង៥៥លានដុល្លារអាមេរិកតែប៉ុណ្ណោះ៕

ណាសាបង្ហោះយានតំលៃ២,៥ពាន់លានដុល្លារឆ្ពោះទៅភពអង្គារ

ហែន សុថារដ្ឋ — Tue, 29 Nov 2011 04:17:37 +0000

អង្គការអវកាសអាមេរិកបានបង្ហោះយាន Curiosity ប៉ុនកូនរថយន្ត ដែលមានតម្លៃ ២,៥ ពាន់លានដុល្លារ ដើម្បីសិក្សាថាភពក្រហមនេះ អាចមានជីវិតឫអត់ នៅម៉ោង១០ និង០២នាទី កាលពីថ្ងៃសៅរ៍ នៅបញ្ជាការកងទ័ពជើងអាកាស Cape Canaveral នៅរដ្ឋ Floridaហើយវានឹងធ្វើដំណើរ៥៧០លានគីឡូម៉ែត្រក្នុរយៈពេល៨ខែកន្លះមុនទៅដល់គោលដៅ។

រ៉ុក្កែត Atlas ទំងន់ ៥០០ តោនបានយោងទៅជាមួយនូវយានមនុស្សយន្តដើរដោយថាមពលភ្លុយតូនីញ៉ូមទំហំប៉ុនរថយន្តឆ្ពោះទៅកាន់ភពព្រះអង្គារ ។

លោក អាស្វីន វ៉ាសាវ៉ាដា អនុប្រធានគម្រោង MSL នៅមន្ទីរពិសោធន៍ Jet Propulsion Laboratory (JPL) របស់ណាសា ក្នុងទីក្រុង Pasadena បានថ្លែងប្រាប់នៅឯសន្និសិទកាសែតមួយកាលពីថ្ងៃទី ១០ វិច្ឆិកាថា «នេះគឺជាម៉ាស៊ីនក្នុងក្តីសុបិន្តរបស់អ្នកវិទ្យាសាស្ត្រស្រាវជ្រាវនៅភពព្រះអង្គារ» ។

«យានមនុស្សយន្តនេះមិនត្រឹមតែជាយានមនុស្សយន្តដែលមានសមត្ថភាពខាងបច្ចេកវិទ្យាបំផុតដែលធ្លាប់ត្រូវបានបញ្ជូនទៅភពដទៃទៀតប៉ុណ្ណោះទេ តែវាពិតជាអ្នកស្រាវជ្រាវផ្នែកវិទ្យាសាស្ត្រដ៏មានសមត្ថភាពបំផុតដែលយើងធ្លាប់បញ្ជូនចេញទៅក្រៅភព» ។

យានមនុស្សយន្ត Curiosity ត្រូវចាប់ផ្តើមបានបង្កើតឡើងក្នុងឆ្នាំ ២០០៤ និង មានទំងន់ ១តោន ធ្ងន់ជាងយានមនុស្សយន្តទៅកាន់ភពអង្គារពីរគ្រឿងលើកមុនមាន យានមនុស្សយន្ត Spirit និង Opportunity រហូតដល់ទៅ៥ ដងឯណោះ ។

អំឡុងពេល ២៣ ខែបន្ទាប់ពីចុះចតនៅលើភពព្រះអង្គារ យានមនុស្សយន្ត Curiosity នឹងវិភាគនូវគំរូរាប់សិបគំរូដែលទាញយកពីដុំថ្ម ឬ បារចេញពីដីនៅលើភពព្រះអង្គារ ខណៈដែលវានឹងធ្វើការរុករកបានក្នុងរយៈចំងាយឆ្ងាយជាងយានមនុស្សយន្តទៅកាន់ភពព្រះអង្គារលើកមុនៗទៅទៀត ៕

ឆ្កែដ៏ស្មោះត្រង់! នៅយាមផ្នូរសពម្ចាស់១៤ឆ្នាំ

ហែន សុថារដ្ឋ — Sat, 26 Nov 2011 11:55:15 +0000

ឆ្កែចិនមួយក្បាលនេះដែលមានភក្តីភាពចំពោះម្ចាស់របស់វាមិនព្រមដើរចេញពីកន្លែងបញ្ចុះសពម្ចាស់របស់វានោះទេ បើទោះបីជាវាមិនបានស៊ីអាហារអស់រយៈពេលមួយសប្តាហ៍ក៏ដោយ។

ឆ្កែតូចដែលមានរោមពណ៌លឿងនេះបានទៅកន្លែងផ្នូរសពម្ចាស់របស់វាស្ទើរតែរាល់ថ្ងៃអស់រយៈពេល១៤ឆ្នាំ។ នៅពេលវាទៅដល់កន្លែងផ្នូរសពនេះ វាដេកឬឈរនៅតែជិតកន្លែងបញ្ចុះសពម្ចាស់របស់វា បើទោះបីជាពេលខ្លះមានភ្លៀងធ្លាក់ក្តី។

ម្ចាស់របស់ឆ្កែដ៏ស្មោះត្រង់នេះឈ្មោះឡៅ ប៉ាន់ ដែលបានស្លាប់ក្នុងអាយុ៦៨ឆ្នាំនោះបានរស់នៅតែម្នាក់ឯកងក្នុងផ្ទះដ៏តូចមួយជាមួយឆ្កែនេះនៅក្នុងភូមិប៉ានជាទុន ក្នុងប្រទេសចិន ។

ដោយមានចិត្តអាណិតអាសូរចំពោះឆ្កែនេះ អ្នកភូមិម្នាក់ដែលរស់នៅក្នុងភូមិនេះដែរ បានសម្រេចចិត្តយកវាមកចិញ្ចឹម ប៉ុន្តែ វាបានរត់មករកកន្លែងផ្នូរសពរបស់ម្ចាស់វាវិញ បើទោះបីជាអ្នកភូមិនេះបានផ្តល់អាហារគ្រប់គ្រាន់សំរាប់វាក៏ដោយ។

ដោយសារតែវាចេះតែរស់មករកកន្លែងផ្នូរសពនេះដែលនាំអោយក្តីអាណិតកាន់តែខ្លាំងឡើងចំពោះវានោះ នៅទីបំផុត អ្នកភូមិនេះនិងមនុស្សដ៏ទៃទៀតដែលរស់នៅក្នុងភូមិនេះបានសុខចិត្តយកអាហារទៅអោយវា ហើយមានគំរោងសង់ខ្ទមតូចមួយនៅក្បែរផ្នូរនេះសំរាប់វាថែមទៀត៕

ម្ហូបអាហារ និង លំហាត់ប្រាណជួយពន្យឺតដំណើរទៅរកភាពចាស់

ហែន សុថារដ្ឋ — Thu, 24 Nov 2011 07:21:36 +0000

ចំណីអាហារគឺជាផ្នែកមួយដ៏សំខាន់នៃជីវិតប្រចាំថ្ងៃរបស់មនុស្ស ។ ម្ហូបអាហារទាំងនោះជួយចិញ្ចឹមកោសិកានៃរាងកាយរបស់យើង ដូច្នេះហើយទើបរាល់ប្រព័ន្ធសរីរាង្គរបស់យើងអាចដំណើរការបានជាធម្មតា ។

ចំណីអាហារក៏ដូចជាលំហាត់ប្រាណផងដែរគឺជាកត្តាដ៏សំខាន់ក្នុងដំណើរវិវឌ្ឍន៍ទៅរកភាពចាស់ផងដែរ ។ ពួកវាថែមទាំងអាចបង្កើនឬបន្ថយល្បឿននៃដំណើរវិវឌ្ឍន៍ទៅរកភាពចាស់ទៀតផង ។ដូច្នេះប្រសិនបើគោលដៅរបស់អ្នកគឺដើម្បីរស់នៅក្នុងជីវភាពដែលមានគុណភាពខ្ពស់ឲ្យបានកាន់តែយូរ ខាងក្រោមនេះគឺជាជំរើសម្ហូបអាហារល្អបំផុត និងកម្មវិធីធ្វើលំហាត់ប្រាណមួយចំនួនដែលនឹងនាំអ្នកឲ្យឈានដល់គោលដៅចុងក្រោយរបស់អ្នក ។

ចំណីអាហារដែលជួយពន្យឺតដំណើរវិវឌ្ឍន៍ទៅរកភាពចាស់រួមមាន៖

ពពួកផ្លែប៊័ររី : ផ្លែប៊័ររីជាពិសេសក្រុមផ្លែប្ល៊ែកប៊័ររី ផ្លែស្ត្រ៉រប៊័ររី និងផ្លែប៊្លូប៊័ររី មានកំរិតសារធាតុ Flavonoids ឬវីតាមីន P ខ្ពស់ ជាប្រភេទសារធាតុមួយប្រឆាំងអុកស៊ីតកម្មដ៏មានថាមពលបំផុតក្នុងចំណោមសារធាតុដទៃទៀតដែលជួយដល់រាងកាយក្នុងការប្រយុទ្ធប្រឆាំងនឹងម៉ូលេគុល Free Radicals បំផ្លាញសុខភាពដែលបង្កឲ្យមានជំងឺមហារីក និង ធ្វើឲ្យចាស់មុនអាយុ ។ ផ្លែឈើទាំងនេះក៏អាចជួយពង្រឹងការចងចាំដែលអន់ថយទៅនៅពេលយើងឈានចូលវ័យកាន់តែចាស់ផងដែរ ។

ពពួកបន្លែដែលមានមែកធាងៈ ទទួលទានបន្លែដែលមានមែកធាងដូចជាផ្កាខាត់ណា ស្ពៃក្រញាញ់ ស្ពៃក្តោប ស្ពៃក្រហម បន្លែស្លឹក មើមស្ពៃ និង សណ្តែកបណ្តុះផ្តល់ឲ្យអ្នកនូវការការពារបន្ថែមពីសារធាតុពុល Toxins និង ប្រភេទថ្នាំបរទេសផ្សេងទៀតដែលជំរុញល្បឿនឲ្យឆាប់ចាស់ ធ្វើឲ្យប្រព័ន្ធភាពស៊ាំចុះខ្សោយ និង បង្កឲ្យមានជំងឺច្រើន ។

ដើម្បីទទួលបាននូវអត្ថប្រយោជន៍ពីគុណប្រយោជន៍នៃបន្លែទាំងនោះ អ្នកត្រូវតែទទួលទានប្រភេទបន្លែដែលមានមែកធាងមួយណាក៏បានឲ្យបាន ១១៥ ក្រាមក្នុងមួយថ្ងៃ និងល្អបំផុតគឺទទួលទានទាំងនៅស្រស់ ។

ស្ពីណាច Spinach (បន្លែម្យ៉ាងដូចស្ពៃខ្មៅ): Spinach គឺជាប្រភេទបន្លែមួយផ្សេងទៀតដ៏សំខាន់ក្នុងការទទួលទានរាល់ថ្ងៃ ។ Spinach សំបូរនូវវីតាមីន K ដែលក្រៅពីមានសារៈសំខាន់ក្នុងធ្វើឲ្យឈាមកក វាក៏ជួយកាត់បន្ថយនូវផលប៉ះពាល់នៃភាពចាស់ទៅលើគុណភាពឆ្អឹងផងដែរ ។ Spinach ក៏សំបូរនូវសារធាតុ Zeazanthin និង Lutein (សារធាតុលឿងក្នុងស៊ុត) និងជីវជាតិទ្រទ្រង់រាងកាយ ដែលជួយកាត់បន្ថយនូវហានិភ័យនៃភាពស្រវាំងភ្នែកក្នុងចំណោមមនុស្សចាស់ផងដែរ ។

ប៉េងប៉ោះ: ប៉េងប៉ោះសំបូរនូវសារធាតុលីកូពីន (Lycopene) ជាសារធាតុប្រឆាំងអុកស៊ីតកម្មដែលមិនត្រឹមតែរ៉ាប់រងក្នុងការធ្វើឲ្យបន្លែនិងផ្លែឈើមានពណ៌ក្រហមប៉ុណ្ណោះទេ វាក៏ជួយការពារស្បែកពីការបំផ្លាញដោយពន្លឺព្រះអាទិត្យ និង ជំងឺមហារីកផងដែរ ។ ទទួលទានប៉េងប៉ោះ ឬទឹកប៉េងប៉ោះរាល់ថ្ងៃនឹងមិនត្រឹមតែផ្តល់ឲ្យអ្នកនូវស្បែកភ្លឺរលោងប៉ុណ្ណោះទេ តែវាក៏នឹងជួយឲ្យអ្នកនៅក្មេងនិងមានសុខភាពល្អយូរអង្វែងផងដែរ ។

គ្រាប់រុក្ខជាតិម្យ៉ាងឈ្មោះថាអាល់ម៉ុង Almond : Almond សំបូរនូវសារធាតុវីតាមីន E ជាប្រភេទសារធាតុប្រឆាំងអុកស៊ីតកម្មដ៏មានឥទ្ធិពលដែលធ្វើមុខងារក្នុងការការពារសាច់ដុំក៏ដូចជាប្រព័ន្ធសរសៃប្រសាទផងដែរ ។ ទទួលទាន Almond ជាប្រចាំជួយបង្ការនូវបញ្ហាពាក់ព័ន្ធជាមួយល្បឿន លំនឹងខ្លួន និង ដំណើរផ្លាស់ទីនៃរាងកាយដោយគ្មាភាពឆ្គាំឆ្គងផងដែរ ។

ផ្លែអាវ៉ូកាដូ (ផ្លែប៊័រ): Avocado ល្អសម្រាប់សុខភាពព្រោះវាមានសារធាតុខ្លាញ់មានប្រយោជន៍ដែលជួយកាត់បន្ថយនូវកំរិតសារធាតុកូឡេសស្តូរ៉លមិនល្អ ។ វាក៏មានផ្ទុកនូវវីតាមីន E ដូច្នេះវាក៏ល្អសម្រាប់ស្បែកផងដែរ ។

ម្សៅការី (Curry Powder): សារធាតុប្រឆាំងអុកស៊ីតកម្មក្នុងម្សៅការីជួយកាត់បន្ថយអត្រានៃការកើតជំងឺបាត់ការចងចាំដែលជាអាការៈកើតឡើងទូទៅសម្រាប់មនុស្សចាស់ ។

ផ្លែឪឡឹក: ឪឡឹករួមទាំងគ្រាប់ផងដែរគឺសំបូរនូវវីតាមីន A, B, C, និង E បូករួមទាំងសារធាតុ Selenium ស័ង្កសី និង សារធាតុខ្លាញ់មានប្រយោជន៍ ។ រាល់សារធាតុទ្រទ្រង់រាងកាយទាំងអស់នេះវាដើរតួក្នុងការជួយការពារស្បែកក៏ដូចជារាងកាយពីភាពចាស់មុនអាយុផងដែរ ។

ទឹក: មែនហើយ អ្នកប្រហែលជាមិនដែលគិតថាទឹកគឺជាប្រភេទអាហារនោះទេ ប៉ុន្តែវាគឺជាអ្វីមួយដែលអ្នកបានផឹក ឬត្រូវតែផឹកឲ្យបានចំនួនមួយដ៏ច្រើនរាល់ថ្ងៃ ។ ទឹកមានសារធាតុធ្វើឲ្យស្បែកមានសំណើមដែលជួយរក្សាស្បែកឲ្យទន់ រលោង និង មើលទៅក្មេងជាងវ័យ ប៉ុន្តែលើសពីនេះទៅទៀតទឹកធ្វើឲ្យការរំលាយអាហារមានភាពប្រសើរឡើង ជួយសំអាតនូវប្រព័ន្ធផ្សេងៗក្នុងរាងកាយ និង ជួយលាងសំអាតនូវជាតិពុល Toxins ។

ប្រភេទលំហាត់ប្រាណដែលជួយបន្ថយល្បឿននៃដំណើរវិវឌ្ឍន៍ទៅរកភាពចាស់៖

លំហាត់ប្រាណធ្វើឲ្យបេះដូងមានសុខភាពល្អ ។ ការដើរ ការហែលទឹក ការជិះកង់ ការរាំ ការធ្វើលំហាត់ប្រាណស្រូបយកខ្យល់អុកស៊ីហ្សែន ឬ ក៏ទំរង់នៃលំហាត់ប្រាណជំនួយបេះដូងផ្សេងៗទៀត នៅពេលដែលធ្វើបែបនេះពី១៥នាទីទៅ១ម៉ោងឲ្យបាន៣ទៅ៤ដងក្នុងមួយសប្តាហ៍ នឹងជួយដល់ដំណើរការមុខងារនៃបេះដូង ។

លំហាត់ប្រាណបែបតស៊ូអត់ធន់ (រត់ប្រណាំង) ។ លំហាត់ប្រាណបែបនេះវាជួយបង្កើនឬទទួលបានមកវិញនូវការបាត់បង់គុណភាពឆ្អឹង ពង្រឹងកម្លាំង និង តុល្យភាពក្នុងរាងកាយ ។

លំហាត់ប្រាណដែលធ្វើឲ្យធូរស្បើយក្នុងចិត្ត ។ លំហាត់ប្រាណបែបពត់ពេនរាងកាយ (Yoga និង Pilates) អាចជួយពន្យឺតនូវដំណើរវិវឌ្ឍន៍ទៅរកភាពចាស់ដោយបង្កើតនូវតុល្យភាពដែលមានសុខភាពល្អក្នុងចំណោមប្រព័ន្ធនានាក្នុងរាងកាយ ៕

ព្យុះទី៤ឈ្មោះហៃម៉ានឹងធ្វើអោយមានភ្លៀងច្រើននៅកម្ពុជា

ហែន សុថារដ្ឋ — Thu, 23 Jun 2011 07:02:18 +0000

ព្យុះឈ្មោះហៃម៉ាដែលក្រសួងធនធានទឹកបានជូនដំណឹងកាលពីថ្ងៃទី២១មិថុនា វានឹងឡើងគោកនៅកោះហៃណាំធ្វើអោយមានខ្យល់ខ្លាំងនៅថ្ងៃទី២២និងធ្វើអោយមានភ្លៀងច្រើននៅថ្ងៃបន្ទាប់ ព្រមជាមួយគ្នានេះមានវិសម្ពាធមួយទៀតបានកើតនៅលើប្រទេសហ្វីលីពីន អាចនឹងក្លាយជាព្យុះនៅពេលបន្ទាប់ទៀត។

លោកម៉ៅ ហាក់អគ្គនាយករងទទួលបន្ទុកការងារបច្ចេកទេសនៃក្រសួងធនធានទឹកនិយាយនៅថ្ងៃទី២២មិថុនាឆ្នាំ២០១១នេះថាព្យុះទី៤ឈ្មោះហៃម៉ាដែលក្រសួងធនធានទឹកបានជូនដំណឹងកាលពីថ្ងៃទី២១មិថុនានោះនៅថ្ងៃនេះ(២២មិថិនា)វាមានល្បឿនទៅមុខកាន់តែយឺតហើយវានឹងឡើងគោកនៅកោះហៃណាំនាថ្ងៃទី២៣មិថុនាអាចនឹងបង្កអោយមានភ្លៀងច្រើនកម្ពុជា តែសម្រាប់ថ្ងៃទី២២មិថុនានេះមានខ្យល់ខ្លាំង។ ព្រមពេលជាមួយគ្នានេះមានវិសម្ពាធមួយទៀតកំពុងស្ថិតនៅលើប្រទេសហ្វីលីពីន ដែលអាចនឹងក្លាយជាព្យុះនៅថ្ងៃបន្ទាប់។

កាលពីថ្ងៃទី២២មិថុនាឆ្នាំ២០១១ ក្រសួងធនធានទឹកនិងឧតុនិយមបានជូនដំណឹងសាធារណៈថានៅវេលាម៉ោង១៣រសៀលថ្ងៃទី២១មិថុនាឆ្នាំ២០១១មានព្យុះមួយឈ្មោះហៃម៉ាកើតមាននៅក្នុងសមុទ្រចិនខាងត្បូង ត្រង់ចំណុចខ្សែស្រប១៩អង្សា៧នៃរយៈទទឹងខាងជើង និង ខ្សែវណ្ឌ១១៦ នៃរយៈបណ្តោយខាងកើតកំពុងធ្វើដំណើរឆ្ពោះទៅភាគខាងជើងនៃកោះហៃណាំ ក្នុងល្បឿន១៥គីឡូម៉ែត្រក្នុង១ម៉ោង។ ព្យុះនេះនឹងមានឥទ្ធិពលមកលើព្រះរាជាណាចក្រកម្ពុជាចាប់ពីថ្ងៃទី២២ដល់២៤មិថុនាឆ្នាំ២០១១ ពិសេសនៅតំបន់មាត់សមុទ្រ តំបន់ខ្ពង់រាបភាគខាងជើងនិងតំបន់ខ្ពងរាបឦសាន។

សេចក្តីជូនដំណឹងដែលចុះហត្ថលេខាដោយលោកលឹម គានហោ រដ្ឋមន្ត្រីក្រសួងធនធាននិងឧតុនិយមចុះថ្ងៃទី២១មិថុនានេះបង្ហាញអោយឃើញទៀតថាតំបន់ខ្ពង់រាបភាគខាងជើង និងតំបន់ខ្ពង់រាបភាគឦសានអាចមានភ្លៀងធ្លាក់ច្រើននិងបង្កអោយមានជំនន់ទឹកភ្លៀងនៅខេត្តមួយចំនួនដូចជាព្រះវិហារ ឧត្តរមានជយ័ ក្រចេះ ស្ទឹងត្រែង រតនគីរី និងខេត្តមណ្ឌលគីរី។ តំបន់មាត់សមុទ្រមានភ្លៀងធ្លាក់ច្រើន និង មានខ្យល់បក់បោកខ្លាំងនៅខេត្តកោះកុង ព្រះសីហនុ កែប និង ខេត្តកំពត ។ រលកសមុទ្រ មានកម្ពស់ពី១-២ម៉ែត្រ។ ឥទ្ធិពលនៃព្យុះនេះក៏ធ្វើអោយកម្ពស់ទឹកទន្លេមេគង្គហក់ឡើងផងដែរ។

លោកម៉ៅហាក់បាននិយាយអោយដឹងផងដែរថា ទឹកទន្លេមេគង្គចាប់ផ្តើមមានចលនា ហក់ឡើងហើយព្យុះហៃម៉ាអាចនឹងធ្វើអោយមានភ្លៀងធ្លាកច្រើននៅតំបន់អាងទន្លេមេគង្គ ។ នៅថ្ងៃទី២២មិថុនានេះទឹកទន្លេមេគង្គនៅស្ថានីយជលសាស្ត្រទន្លេបាសាក់ចតុមុខ មានកម្ពស់៤.២២ម៉ែត្រខ្ពស់ជាងថ្ងៃទី២១ មិថុនា ០.៣៤ម៉ែត្រហើយនៅថ្ងៃទី២៣មិថុនាទឹកនៅស្ថានីយនេះអាចនឹងឡើងដល់៤.៤៩ម៉ែត្រ។

ដកស្រង់ពី កាសែតរស្មីកម្ពុជា ចេញផ្សាយថ្ងៃទី២៣ មិថុនា ២០១១

Chrome OS របស់ក្រុមហ៊ុន Google

ហែន សុថារដ្ឋ — Fri, 17 Dec 2010 03:34:55 +0000

សម្រាប់គ្រប់គ្នាដែលធ្លាប់ប្រើប្រាស់កុំព្យូទ័រ គឺគ្មាននរណាម្នាក់ដែលថាមិនបានលឺពាក្យថា Microsoft Windows នោះឡើយ ប៉ុន្តែថ្មីៗនេះលោក Linus Upson ដែលជាអនុប្រធានក្រុមហ៊ុន Google បាននិយាយថាលោកបានបង្កើតប្រព័ន្ធប្រតិបត្តិការដែលបង្កើតឡើងដោយក្រុមហ៊ុន Google ថ្មីមានឈ្មោះថា Chrome OS ដោយយោងតាមការសិក្សាស្រាវជ្រាវរបស់ក្រុមហ៊ុន Google ហើយលោក Upson ក៏បន្ថែមទៀតថាគាត់សង្ឈឹមថាប្រព័ន្ធការងាររដ្ឋបាលមួយនឹងត្រូវបានប្រសើរឡើងដោយសារអ្វីៗវានឹងធ្វើបច្ចុប្បន្នភាព (update) តាមរយៈ online ប៉ុន្តែវានៅមានបញ្ហាដ៏ធំដែលធុរៈកិច្ច (businesses) ជាច្រើននៅតែប្រើប្រាស់ Microsoft Office ដែលមិនអាចគិតថាវានឹងផ្លាស់ទៅជាប្រភេទកម្មវិធីដែលមានទម្រង់និងមានមូលដ្ឋានជា Web ដែលអាចរក្សាទុកឯកសារតាមរយៈ online បានពេញលេញនោះដែរ។ Google Chrome OS នឹងមានគម្រោងបញ្ចូលទៅក្នុង Net Book នាពាក់កណ្ដាលឆ្នាំ២០១១ក្នុងនោះ HP និង Acer ក៏ស្ថិតក្នុងគម្រោងនេះដែលកុំព្យូទ័រប្រភេទ Net Book មាននិមិ្មតសញ្ញារបស់ Google Chrome OS គឺ think Nexus One ដែលនឹងចេញក្នុងខែធ្នូនេះ។

តើ Window 8 ពិតជាចេញមកទៀតហើយមែនទេ?

ហែន សុថារដ្ឋ — Wed, 15 Dec 2010 07:33:20 +0000

មានអ្នកខ្លះនិយាយថា Window 8 បានចេញអោយប្រើហើយឬកំពុងប្រើថែមទៀតផង។រឿងនេះគឺពិតជាគួរឲ្យចម្លែកណាស់ព្រោះ Window 7 ទើបនឹងចេញជាផ្លូវការ នៅខែ កក្កដា ២០០៩មកដល់ឥឡូវទើបនឹងបានជាងមួយឆ្នាំហេតុអ្វីបានជាមាន window 8 ចេញមកទៀត ហើយ?

Window 8 Transformation Pack

តាមពិតពួកគេប្រហែលជាប្រើ Windows 8 Transformation Pack ដែលបន្ទាប់ពីយើងដំឡើងវាហើយវានឹងប្ដូរ Window របស់យើងទៅរូបរាង windows 8 ដែលខុសពី Theme ធម្មតា។ Windows 8 Transformation pack មាននូវលក្ខណៈពិសេសជាច្រើនជាមួយនឹងការ design រូបរាងថ្មីដូចជា Taskbar, Explorer, boot screen និង login screen ថ្មី។ល។
Windows 8 transformation Pack នេះមានរូបរាងមិនដូចនឹង Windows 8 ទេគឺវាត្រូវបានបង្កើតតាមការគិតរបស់អ្នកបង្កើតគឺលោក Mufflerexoz ដោយប្រើ DeviantART។

Window 8 Transformation Pack មានក្នុង CD Windows 8 របស់ Microsoft

ក្រុមហ៊ុន Microsoft កំពុងរៀបចំបង្កើត Windows 8 ហើយបម្រុងនឹងចេញចុងឆ្នាំ២០១១នេះប៉ុន្តែនាចុងខែតុលានេះ Microsoft បាននិយាយថា Windows 8 នឹងចេញប្រហែល២ឆ្នាំទៀត (ប្រហែលចុងឆ្នាំ២០១២ ឬ២០១៣)។ខាងក្រោមនេះជាគំនិតខ្លះៗដែលមានក្នុង Windows 8។

មានអ្វីខ្លះក្នុង Windows 8?

តាមការប្រកាសពីគេហទំព័រផ្សេងៗបានអោយដឹងពីលក្ខណៈពិសេសដែលមានក្នុង Windows 8 ដូចជា៖
-មានIE9 និង Windows Media Player ជំនាន់ថ្មី
-Support ជាមួយនឹង USB 3.0 ព្រមទាំង Bluetooth 3.0
-Interface ជាលក្ខណៈ 3D
-មានDesktop store (ដូចនឹង Mac App Store ដែរ)
-Logins តាមមុខរបស់អ្នកប្រើ
-មាននូវ Body-sensing ស្រដៀងនឹង Xbox Kinect
-រយៈពេល boot-up មានល្បឿនលឿនជាងមុន
-អាចដំណើរការនៅលើកំព្យូទ័រ 128-bits

យុវវ័យសម័យថ្មី

ហែន សុថារដ្ឋ — Fri, 12 Nov 2010 04:53:32 +0000

កាលពីពេលកន្លងទៅថ្មីៗនេះ ខ្ញុំបើកម៉ូតូតាមផ្លូវឃើញក្មេងស្ទាវៗមួយចំនួនឈ្លក់វង្វេងនឹងសង្គមខ្លាំងណាស់។ ក្មេងមួយចំនួនចូលចិត្តនិយាយទូរស័ព្ទទៅកាន់មិត្តភក្តិ ឫក៏កំណាន់ចិត្តរបស់គេម្តងៗរាប់ម៉ោង ឯខ្លះទៀតឈ្លក់នឹងការតុបតែងកាយប្លែកៗតាមបែបអរិយធម៌បរទេស ហើយបើកម៉ូតូជែងគេឯងយ៉ាងលឿនបែបសង្ហារ។
ម្យ៉ាងដែរ បើនិយាយពីការចូលចិត្តនិយាយទូរស័ព្ទម្តងៗរាប់ម៉ោងរបស់យុវវ័យឥឡូវនោះ យើងមិនអាចបន្ទោសគេបានទេ ព្រោះនេះជាម័យបច្ចេកវិទ្យាទាន់សម័យ។ ក្រុមហ៊ុនទូរស័ព្ទចល័តនានាខំប្រឹងរិះរកការផ្សព្វផ្សាយថ្មីៗដើម្បីបម្រើដល់អតិថិជន ពិសេសអតិថិជនក្នុងស្រទាប់ទើបនឹងរះនេះឯង។ ចាំអីទៀត! បញ្ចូលលុយម្តងថែមសុទតែ៥០ភាគរយ ឫ១០០ភាគរយ មានសម្រាប់ក្នុងប្រព័ន្ធ ក្រៅប្រព័ន្ធទៀត រឿងអីថាមិននិយាយ! និយាយហើយនិយាយទៀត តាំងពីក្នុងផ្ទះរហូតដល់ក្រៅផ្ទះ តាំងពីថ្ងៃរះរហូតដល់ថ្ងៃលិច។ បើនិយាយពីស៊ីមវិញ អាមួយអស់លុយ ដូរដាក់អាមួយទៀត។ បែបនេះ បើប្រាប់គេថាខ្មែរក្រនោះ តើគេជឿដែរទេ?
ចំណែកការតុបតែងលំអរកាយាវិញហ្អេះ! ខ្ញុំនេះបានត្រឹមតែមើលប៉ុណ្ណោះព្រោះបើមានគេរៀបចំតែងកាយស្អាតបែបនេះត្រូវតែមើល។ តែស្អីដែល អាម៉ាស់នោះគឺ ការតុបតែងរបស់ក្មេងឥឡូវពិបាកមើលត្រង់ថាវាលលើចំហរក្រោម ទោះបើខែក្តៅយ៉ាងណាក៏នៅតែវាលដែរមិនខ្លាចខូចស្បែកទេ ប្រហែលគេក្តៅស្អុះក៏ថាបាន។ លុះដល់ខែរងារ ក៏នៅតែវាលចំហរដដែល គេមិនរងារខ្លះទេឫយ៉ាងម៉េច? ពិតជាពូកែមែនយុវវ័យសម័យថ្មី!
ទន្ទឹមនឹងភាពហ៊ឺហារជាមួយទូរស័ព្ទ គ្រឿងលំអរកាយអស់នោះ ក៏មានទាំងម៉ូតូទំនើបៗដេញសេរីជិះជ្រែគេឯង វ៉ាឡានកាច់រាងចុះឡើងតាមផ្លូវសាធរណៈ ដោយមិនមានការអៀនខ្មាស់អីសោះ។ បើមិនខ្មាស់ខ្លួនឯង ឫអ្នកដទៃ ក៏គួរណាគិតដល់ឪពុកម្តាយអ្នកមានគុណដែរ តើលោកខ្មាស់គេជួសយើងយ៉ាងណាទៅ។ ពេលសប្បាយគិតតែខ្លួនឯង ម៉ែឪនៅផ្ទះមិនខ្ចីខ្វល់ដល់ជួបគ្រោះភ័យតាំងរត់រកម៉ែឪហើយ ហេងស៊យអាចម៉ែឪជាអ្នកធ្វើបុណ្យឲ្យកូនផងក៏មិនដឹង។
បើក្មេងឥឡូវទៅរៀនចេះបានប្រហែលការតែងខ្លួននោះប្រហែលប្រទេសរីកចំរើនហើយ ហេតុនេះគួរគិតឲ្យវែងឆ្ងាយផង កុំយកអនាគតខ្លួនមកបោះចោលកណ្តាលផ្លូវចឹង វាគ្មានកំណើតទេ។

ខកចិត្តថ្ងៃធ្លាក់ខ្យល់ដំបូង

ហែន សុថារដ្ឋ — Fri, 29 Oct 2010 04:38:38 +0000

ព្រឹកនេះ ជាថ្ងៃទី២៩ ខែតុលា បើរាប់តាមថ្ងៃខែខ្មែរគឺថ្ងៃ៦រោច ខែអស្សុជដែលជាថ្ងៃដែលជិតឈានចូលដល់ខែកក្តិក និងជាខែធ្លាក់ខ្យល់លាយឡំនឹងអាកាសធាតុត្រជាក់។ ប៉ុន្តែ ថ្ងៃនេះនៅមិនទាន់ដល់ខែនោះនៅឡើយទេ ស្រាប់តែព្រលឹមស្រាងៗឡើងមានខ្យល់ធ្លាក់រំភើយៗត្រជាក់ដល់បេះដូងតែម្តង ធ្វើឲ្យខ្ញុំនេះរងារដល់កហ្មង! ហេហេហេ…

នឹកឃើញកាលពីឆ្នាំកន្លងទៅ កាលពីនៅរៀនមិនទាន់មានការងារធ្វើ ឲ្យតែដល់ខែនេះគឺបបួលមិត្តភក្តិទៅស្ទូចត្រីហើយធ្វើអីញ៉ាំជុំគ្នានៅមាត់ទឹក មានដូចជាបុកល្ហុង បង្អែម នំគ្រក់ ព្រមទាំងមានភេសជ្ជៈ និងគ្រឿងម្ជូរទៀតផង! មិនតែប៉ុណ្ណោះ បន្ទាប់ពីហូបរួចយើង ក៏មានកម្មវីធីព័ទ្ធវង់ដែរ (លេងបៀរ) គិតៗទៅសប្បាយម្យ៉ាងដែរ។ ស្រាប់តែពេលនេះ នឹកចង់មានកម្មវិធីអីចឹងទៀត តែទៅមិនរួចសោះព្រោះការងារត្រូវតែធ្វើហើយមិនអាចបោះបង់ការងារដោយសារពិធីជប់លៀងនោះទេ បើមិនចឹងច្បាស់ជាទាត់ខ្យល់មិនខាន។

ប៉ុណ្ណឹង មិនជារឿងគួរឲ្យសោកស្តាយប៉ុន្មានទេ រឿងដែលស្តាយនោះគឺថា ថ្ងៃនេះជាថ្ងៃឈប់សម្រាក (ព្រះរាជពិធីគ្រងរាជ្យសម្បត្តិព្រះករុណាសម្តេចព្រះបរមនាថនរោត្តមសីហមុនី) មិត្តភក្តិនាំគ្នាត្រាច់ចរទៅកំសាន្តនៅតាមរមណីយដ្ឋានផ្សេងៗអស់ហើយ តែអភ័ព្វអីតែខ្ញុំ? មិនបានទៅនឹងគេ ព្រោះកាន់អាជីពនៅក្នុងក្រុមហ៊ុនកាសែត គ្មានថ្ងៃបុណ្យទៀននឹងសោះ។ មិនដឹងជាកំសត់អីក៏កំសត់យ៉ាងនេះទេខ្ញុំ! សាក់គិតមើលហើយស្រម៉ៃមើលទៅ មេឃត្រជាក់ហើយធ្លាក់ខ្យល់ពីជើងបែបនេះ បើទៅដើរលេងនឹងគេតើសប្បាយយ៉ាងណា?

តោះ! និយាយគ្នាលេង

ពួក​សិស្ស​ស្ទាវ​ជិះ​ម៉ូតូ​ដេញ​កាប់​គ្នា ប៉ូលិស​ចាប់​បាន​ពីរ​នាក់​

វិស័យ​សំណង់​កើន​ជាង​៩៩​ភាគរយ​ក្នុងរយ​:​ពេល​១០​ខែ​ឆ្នាំ​២០១១

ណា​សា​​បង្ហោះ​យាន​តំលៃ​២,៥​ពាន់​លាន​ដុល្លារឆ្ពោះទៅ​​ភព​អង្គារ​

​ឆ្កែ​ដ៏​ស្មោះត្រង់​! នៅយាមផ្នូរសពម្ចាស់១៤ឆ្នាំ

ម្ហូបអាហារ និង លំ​ហាត់ប្រាណ​​ជួយ​ពន្យឺតដំណើរ​ទៅរក​ភាព​ចាស់​

​ព្យុះ​ទី​៤​ឈ្មោះ​ហៃ​ម៉ា​នឹង​ធ្វើអោយ​មាន​ភ្លៀង​ច្រើន​នៅ​កម្ពុជា​

Chrome OS ​របស់​ក្រុមហ៊ុន Google