ផ្លូវដែកភ្នំពេញ-ទូកមាសបើកឲ្យធ្វើចរាចរណ៍ឡើងវិញ

កំណាត់​ផ្លូវ​ដែក​ប្រវែង ១១០ គម ត្រូវបាន​សម្ពោធ​ដាក់​ឱ្យ​ធ្វើ​ចរាចរណ៍​ឡើង​វិញ​កាលពី​ព្រឹក​ថ្ងៃ​ទី ២២ ខែ តុលា ក្រោយ​ពី​ផ្អាក​ដើម្បី​ជួសជុល​មួយរយៈ​នៅក្នុង​ល្បឿន​កំណត់​ត្រឹម ៥០ គម​ក្នុង​មួយ​ម៉ោង ។
លោក វេន ហាន (Wayne Hunt )​អគ្គនាយក​ក្រុមហ៊ុន ធូល ហ្គោល​ប​ល ឡូ​ជី​ស្ទិច (​Toll’s Global Logistics​) បានឱ្យដឹងថា នៅក្នុង​ដំណាក់កាល​ដំបូង​ជាមួយនឹង​ទឹកប្រាក់​វិនិយោគប្រ​ម៉ាណ​ជា​៥​លាន​ដុល្លារ នេះ​ក្រុមហ៊ុន​បាន​ដាក់ឱ្យ​ដំណើរការ​ត្រឹមតែ​សេវា​ដឹកជញ្ជូន​ទំនិញ​សិន រីឯ​អ្នកដំណើរ​នៅ​មិនទាន់​បាន​កំណត់ ពេលវេលា​ច្បាស់លាស់​នៅឡើយ​ទេ​។​លោក​បាន​បញ្ជ​ក់ថា​នៅក្នុង​ដំណាក់កាល​ដំបូង​គឺ​ក្រុមហ៊ុន​ផ្តល់​ការងារ​ដល់​បុគ្គលិក​ប្រ​ម៉ាណ​ជា ១៥០ នាក់​ហើយ​នឹង​បន្ត​ស្វែងរក​បុគ្គលិក​បន្ថែម ពី ៦០០ ទៅ ៧០០ នាក់​។
លោក តូច ចាន់​កុសល បានឱ្យដឹងថា ការបើក​ចរាចរណ៍​ផ្លូវ​ដែក​ដែល​សម្ភោ​ធរ​លី​កំណាត់​ផ្លូវ ១១០ គម នេះ សេវាកម្ម​ដំបូង​គឺ​ស៊ីម៉ង់ ដោយ​កំណត់​ល្បឿន​ដឹកជញ្ជូន​ត្រឹមតែ ៥០ គម នៅក្នុង​១​ម៉ោង​។​
ការបើក​ចរាចរណ៍​ផ្លូវដែក​នេះ​គឺ​នឹង​អាច​កាត់បន្ថយ​តម្លៃ​ទំនិញ កាត់បន្ថយ ការចំណាយ​លើ​ការថែទាំ​ផ្លូវ ដែល​ខូចខាត​ដោយសារ​តែ​ការដឹក​ធ្ងន់ៗ និង កាត់បន្ថយ​ការកកស្ទះ​ចរាច​រណ៍ ការជំរុញ​និង​កែសំរួល​ដល់​ចរាចរណ៍​ទំនិញ​ឆ្លង​ព្រំដែន​និង​ធ្វើ​សមាហរណកម្ម​នៅក្នុង​តំបន់​ជាដើម​ជាដើម ។
កំណាត់​ផ្លូវ​ដែក ១១០ គម ដែល​ភ្ជាប់​ទីក្រុង​ភ្នំពេញ​ទៅកាន់​ទូក​មាស​ខេត្ត​កំពត​នេះ គឺជា​ផ្លូវ​ដែក កំណាត់​ទី​១​នៃ​កំណាត់​ផ្លូវដែក​នៅ​ភាគខាងត្បូង​របស់​ប្រទេស​។ កំណាត់​ផ្លូវ​ដែក​ទី​២ ប្រវែង ១៤០ គម ដែល​ភ្ជាប់​ពី​ទូក​មាស​ទៅកាន់​ខេត្ត​ព្រះសីហនុ កំពុង​តែ​ជួសជុល ហើយ​រំពឹង​ថា នឹង​ត្រូវ​ត​ភ្ជាប់​នៅក្នុង ឆ្នាំ ២០១១ ។ ផ្លូវដែក​មួយ​ខ្សែរ​ទៀត​ដែល​ភ្ជាប់​ពី​ភ្នំពេញ​ទៅកាន់​ប៉ោយប៉ែ​ត​ព្រំដែន​ថៃ ចំងាយ​ប្រ​ម៉ាណ​ជា ៣៩០ គម នឹង​ត្រូវ​ជួសជុល​រួច​នៅក្នុង​រង្វង់​ឆ្នាំ ២០១២ ខាងមុខ ។
លោក គូ​នី​អូ បានឱ្យដឹងថា កំណាត់​ផ្លូវ​ដែក​ដែល​ត្រូវ​ស្តារ​នេះ​ធនាគារ​អភិ​វឌ្ឈន៍​អាស៊ី​បាន​ផ្តល់ប្រាក់ កម្ចី​ចំនួន ៨៤ លាន​ដុល្លារ អូស្ត្រាលី​បាន​ផ្តល់​ជំនួយឥតសំណង​ចំនួន ២១,៥ លាន​ដុល្លារ មូលនិធិ​អូប៉ិច សំរាប់​អភិ​វឌ្ឈន៍​ចំនួន ១៣ លាន​ដុល្លារ និង ជំនួយ​ជា​ផ្លូវ​ដែក​ពី​រដ្ឋាភិបាល​ម៉ាឡេស៊ី​ចំនួន ២,៨ លាន​ដុល្លារ ដោយឡែក​រដ្ឋាភិបាល​កម្ពុជា​បាន​ចូលរួម​បដិភាគ​មក​ចំនួន ២០,៣ លាន​ដុល្លារ ។